Ingunn Ólafsdóttir, Author at Félag um innri endurskoðun

Stefna FIE 2020-2022

Stjórn FIE samþykkti á fundi sínum þann 22. janúar stefnu fyrir næstu þrjú árin. Í stefnunni eru fjögur markmið og skilgreindar aðgerðir til að ná þeim. Stefnan er að finna í skjalinu hér að neðan.

Markmiðin eru:

A. Vera leiðandi við að byggja upp fagþekkingu á sviði innri endurskoðunar
B. Auka sýnileika og umræðu um ávinning innri endurskoðunar meðal hagsmunaaðila á Íslandi
C. Byggja upp gott innra starf á vegum félagsins, efla samskipti félagsmanna og fjölga félagsmönnum
D. Styrkja tengsl við fagfélög innri endurskoðenda á alþjóðavísu, einkum IIA, ECIIA og systurfélög FIE á Norðurlöndum

Stefna-FIE-2020-2022 Download

Breytingar hjá Alþjóðasamtökum innri endurskoðenda – Global Assembly

Mikilvægar breytingar tóku gildi á stjórnskipulagi Alþjóðasamtakanna í byrjun árs. Global Council var lagt niður og Global Assembly tók til starfa. Hvert aðildarfélag tilnefnir sinn aðalfulltrúa í Global Assembly til tveggja ára og einn varafulltrúa. Stjórn FIE tilnefndi Ingunni Ólafsdóttur, formann félagsins sem sinn aðalfulltrúa og Sigrúnu Lilju Sigmarsdóttur sem varafulltrúa. Stjórnarformaður Alþjóðasamtakanna er formaður Global Assembly.

Global Assembly mun sinna ráðgefandi hlutverki fyrir stjórn Alþjóðasamtakanna um stefnumótandi áherslur og önnur mikilvæg málefni fagstéttarinnar. Þá er því ætlað að stuðla að samræmingu á stefnu samtakanna og aðildarfélaganna og vera vettvangur fyrir leiðtoga fagstéttarinnar til að miðla upplýsingum og hugmyndum til samtakanna og koma að eflingu innri endurskoðunar á heimsvísu.

Global Assembly kemur saman fjórum sinnum á ári, þar af á þremur fjarfundum. Fulltrúar eru skyldugir til að mæta og verður staðfundirnir haldnir víðsvegar um heiminn. Fyrsti fundur Global Assembly verður 11. febrúar (fjarfundur) en fyrsti staðfundurinn í London dagana 29. mars – 1. apríl 2020. Á dagskrá fundarins er stefna Alþjóðasamtakanna fyrir árin 2019-2023.

Ófjárhagslegar upplýsingar og ábyrgar fjárfestingar frá sjónarhóli innri endurskoðunar

Næsti morgunverðarfundur verður haldinn á Grand Hótel 31. október 2019 kl. 08:00-10:00. Bjarni Herrera, framkvæmdastjóri og einn eigandi CIRCULAR Solution og Hrefna Ösp Sigfinnsdóttir, framkvæmdastjóri Markaða hjá Landsbankanum og fyrsti stjórnarmaður samtaka um ábyrgar fjárfestingar IcelandSIF munu fjalla um ófjárhagslegar upplýsingar og ábyrgar fjárfestingar frá sjónarhóli innri endurskoðunar.

Verð 5.500 kr. fyrir félagsmenn og kr. 6.500 fyrir utanfélagsmenn. Innifalinn er morgunverður og kaffi. Ein endurmenntunareining í siðferðisflokki og ein í endurskoðunarflokki.

Skráning í gegnum fie@fie.is. Allir velkomnir!

Félagsmaður nær CRMA faggildingu

Björn Snær Atlason, starfsmaður innri endurskoðunar Landsbankans, hlaut CRMA vottun hjá Alþjóðasamtökum innri endurskoðenda í síðustu viku. Stjórn FIE óskar honum innilega til hamingju! 🎉

Skýrsla stjórnar 2018-2019 og ársreikningur 2018

Aðalfundur FIE fór fram í dag í Veröld hús Vigdísar. Stjórnin var endurkjörin. Hér eru hlekkir inn á skýrslu stjórnar og ársreikning félagsins 2018. Ársreikningur FIE 2018_Undirritaður og Lokaskýrsla stjórnar_FIE_28. maí 2019

Nokkrar myndir af aðalfundinum

Aðalfundur FIE

Aðalfundur FIE verður haldinn 28. maí 2019 kl. 11-12 í Veröld hús Vigdísar. Að fundi loknum verður boðið upp á léttan hádegismat og umræður um áherslur á komandi starfsári.Vinsamlegast tilkynnið um mætingu (fie@fie.is) vegna áætlunar á veitingum fyrir hádegi mánudaginn 27. maí.

Dagskrá aðalfundar:

1. Skýrsla um störf félagsins á liðnu ári.

2. Reikningar félagsins lagðir fram til samþykktar.

3. Breytingar á samþykktum. (Sjá tillögu að breytingu neðst í þessum pósti)

4. Kosning stjórnarmanna.

5. Kosning formanna nefnda skv. 7. gr.

6. Kosning skoðunarmanns annað hvert ár.

7. Ákvörðun félagsgjalds.

8. Önnur mál.

Stjórnin minnir á að allir geta boðið sig fram til stjórnarsetu og hvetur þig eindregið til að íhuga það. Enn fremur hvetur stjórnin félagsmenn til að gefa kost á sér til starfa í nefndum og faghópum á vegum félagsins. Áhugasamir félagsmenn geta haft samband við stjórn félagsins en einnig er hægt að bjóða sig fram á fundinum.

Stjórn FIE

Tillaga að breytingu á samþykktum sem lögð er fyrir aðalfund

Lagt er til að 1. mgr. 6. gr. samþykktanna verði breytt úr:

„Stjórn félagsins skal kosin á aðalfundi sem haldinn skal í maí ár hvert. Kosningar skulu vera skriflegar sé þess óskað. Stjórn félagsins skal skipuð 5 félagsmönnum og skulu þeir skipta með sér verkum. Til að stjórnarfundur sé ákvarðanabær skal meirihluti stjórnarmanna sitja fundinn. Þátttaka í stjórnarfundi í gegnum fjarfundabúnað er heimil. Starf stjórnar skal vera ólaunað en félagið ber kostnað af störfum þeirra. Láti stjórnarmaður af störfum á kjörtímabilinu skal boða til félagsfundar skv. 4. gr. og kjósa mann í stjórn til þess að starfa út kjörtímabil þess sem lét af störfum.“

„Stjórn félagsins skal kosin á aðalfundi sem haldinn skal í maí ár hvert. Kosningar skulu vera skriflegar sé þess óskað. Stjórn félagsins skal skipuð 5 félagsmönnum og skulu þeir skipta með sér verkum. Til að stjórnarfundur sé ákvarðanabær skal meirihluti stjórnarmanna sitja fundinn. Þátttaka í stjórnarfundi í gegnum fjarfundabúnað er heimil. Starf stjórnar skal vera ólaunað en félagið ber kostnað af störfum þeirra. Láti stjórnarmaður af störfum á kjörtímabilinu skal boða til félagsfundar skv. 5. gr. og kjósa mann í stjórn til þess að starfa út kjörtímabil þess sem lét af störfum.“